L'associu di "A fiera di U Casgiu"

I benevulenti di a Fiera di u Casgiu si danu di rumenu ind'un'opera cullettiva chi s'appoghja nantu à dui scopi chjari : a difesa di u pasturalismu é a valurisazione di i casgi casani di Corsica. L'associu accumpagna l'attori di terrenu, sindicati, camere cunsulare, offizii é associ di pruduttori appughjendusi nantu à e strutture prufessiunale é istituzione publiche cù e quale zifra cunvenzione di cullaburazione. Cusi, a fiera di u mese di maghju hè diventata un fattu chi và aldilà d'una semplice manifestazione d'un paese muntagnolu.


Dopu arricoltu e testimunianze di i pruduttori tradiziunali in quantu à a so pratica é u so sapé fà, a Cummissione Tecnica di l'associu , cumposta di pruduttori, inginieri é tecnichi spezializati,assesta tutti l'anni assaghji chi permettenu d'identificà é di precizà i criteri di "tipicità" di i 5 "tippi" di casgi casani oramai ricunnisciuti : bastelicaccia, calinzana, niulincu, sartinesi é venachese. Sti criteri, s'elli sô rispettati da i pruduttori, permettenu à i candidati à u Cuncorsu Regiunale di i Casgi Casani di Corsica d'ottene, u ghjornu di l'ultimu assaghju, un premiu di tipicità o un premiu d'eccellenza.
St'andatura esigente hà purtatu naturalmente l'associu à allargà a so attività versu tuttu cià chi tocca à u pasturalismu, à l'ecunumia rode u mondu campagnolu, à l'identità culturale, é, dipoi dui anni, à u sviluppu à longu andà. Hé oghje maestra d'opera di i "Scontri Annuali di u Pasturalismu é di u Sviluppu Durevule" à i quali s'associanu, dipoi 2008, l'attori di u mondu agriculu é di a sucietà civile.
Cusi, a Fiera di u Casgiu, accantu à e fiere solu cummerciale o a e feste patrunale, face rinasce a "vendita diretta"da u pruduttore à u cunsumatore è cuntribuisce dunque à l'edificazione é à a ricunniscenza di i territorii di pruduzzione.
Ma, perch'ella hè anzituttu una fiera, ghjè un veru spaziu di scambii é di sulidarità trà l'ecunumia di u liturale é di l'intemu di l'isula, é vole fermà, cù i so canti corsi, a so musica, u so ballu, e so animazione per chjuchi é grandi, una festa.